Marulić, Marko (1450-1524) [1517], De Veteris instrumenti uiris illustribus, versio electronica (), Verborum 29840, Ed. Branimir Glavičić [genre: prosa oratio - vita] [word count] [marulmarvirill].
DEVTERONOMIVM
Moyses ad populum uerba faciens dicta factaque eis a Domino recenset, a monte
Oreb usque huc. Admonet pręterea, ut pręcepta Dei obseruent et ea doceant
posteros. De morte sua prędicit. Tres ciuitates separat trans Iordanem ad
confugium illorum, qui nolentes occiderint proximum suum. Hę fuerunt: Bosor,
Ramoth et Golan. Docet populum cerimonias et iudicia eosque ad pręcepta
perficiunda hortatur. Prędicit de uictoria aduersus gentes futura. Enumerat,
quot bona, si Domini pręcepta obseruauerint, consecuturi sint. Commemorat, quod
ducti sint per desertum XL annis, ut tentarentur, an mandata custodirent, quod
pluerit eis manna, ut ostenderet, quod non in solo pane uiuat homo, quod denique
uestimentum illorum uetustate non defecerit nec pes tam diu per solitudines
uagando subtritus sit. Caue, inquit, ne, postquam affluxeris bonis,
efferatur cor tuum et non recorderis Domini, Dei tui. Peribitis , si non
parueritis. Delicta eis pręterita exprobrat, quoties Deum irritauerint
et ipse irritatum precibus suis placauerit. Iubet eos circumcidere prępucium
cordis, diligere proximos, soli Domino seruire, cuius beneficio multiplicati
sunt, cum non nisi in LXX animabus descenderint in Aegyptum. Proponit eis bona,
si obedierint, mala, si non obedierint. Benedictio dicta in monte Garizim,
maledictio in monte Hebal. Iubet euerti idola gentium et in loco, quem elegerit
Dominus, 2Ov holocausta offerri, sanguinem cum
carnibus ne comedant. Iubet et eum, qui idola colenda suaserit, lapident et
reliqua. Sacerdotes, inquit Dominus, et Leuitę non habeant
hęreditatem cum aliis; ego hęreditas eorum. Moyses pręterea ait: CXX
annorum sum hodie; non possum ultra ingredi. Prędicit de uictoria Iosue
duce consequenda terraque possidenda. In tabernaculo ei et ipsi Iosue in
columna nubis apparens Dominus futura reuelauit. Cantauit Moyses canticum:
Audite, cęli, quę, loquor... et cętera quę sequuntur. De Christi
aduentu prophetauit, tribubus benedixit. Ipse Domini iussu de campestribus Moab
ascendit super montem Nebo in uerticem Phasga contra Hierico, et ostendit ei
Dominus omnem terram Galaad. Atque ibi mortuus et sepultus est. Non cognouit
homo sepulchrum eius usque in pręsentem diem. Vixit annos CXX. Mortem eius
luxerunt per dies XXX. Non surrexit propheta in Israhel sicut Moyses.
Marulić, Marko (1450-1524) [1517], De Veteris instrumenti uiris illustribus, versio electronica (), Verborum 29840, Ed. Branimir Glavičić [genre: prosa oratio - vita] [word count] [marulmarvirill].
|