Crijević Tuberon, Ludovik (1458-1527) [1520], Commentariolus de origine et incremento urbis Rhacusanae, versio electronica (), Verborum 5404, Ed. Vladimir Rezar [genre: prosa oratio – historia] [word count] [tuberocommrhac].
Erat inclyta eo tempore Veneti populi, non tam imperii, quod
admodum tenue erat, quam iustitiae caeterarumque ciuilium artium fama. Huc
accedebat publicum simul et priuatum hospitium cum Veneto senatu
Rhacusanis: priuatum mercaturae societate, e qua haud parum emolumenti ad
utrosque perueniebat (id enim temporis omnia fere promercalia in
mediterraneum Illyricum a Rhacusanis mercatoribus ad Slouinos regulos
importanda Venetiis in diem accepta petebantur), publicum quia inde leges,
quibus nunc quoque in litibus dirimendis Rhacusani utuntur, descriptas
attulerant, quamquam Rhacusani, temporibus ita postulantibus, ad Venetas
leges multas ipsi a se latas addiderunt.
Crijević Tuberon, Ludovik (1458-1527) [1520], Commentariolus de origine et incremento urbis Rhacusanae, versio electronica (), Verborum 5404, Ed. Vladimir Rezar [genre: prosa oratio – historia] [word count] [tuberocommrhac].
|