In CroALa inventa

URBIUM NOMINA.

Olyssippo sive Lisibonna,
De me multa velis si dicere, multa supersint
Et satis, ut dicas, hic Lysibonna fuit.

Ebora.
Haec Ebora est, vates ornat quam flavius urbem,
Et quam plus oculis diligit ille suis.

Connimbrica.
Absit, ut exiguae Connimbrica cedat Ilerdae.
Surgit enim magnis aemula Parrhisiis.

D. Hirenae fanum. sive Sanctarem.
Hirenae Fanum donarunt pallas oliva,
Fruge Ceres, Bacchus nectare, pisce Tagus.

Burgos.
Burgos ego. Burgo cedit regale Toletum.
De magnis quoties curia rebus agit.

Toletum.
Iactat se Regum sedem sublime Toletum,
Iactat opes, iactat pontificesque suos.

-- 78 --

Mantua Carpetanorum, idest Madril.
Altera pastores audivit Mantua Cottae,
Altera Virgilii Thyrsin, et arma virum.

SCHOLIUM.

Rodericus Cotta civis Madrilensis bucolicum carmen Hispanica lingua accurate scripsit.

Talavera.
Hispanis aliae parebunt regibus urbes.
Non ego, Reginae quae Talavera feror.

Concha.
Concha vocor, non qua vehitur Citherea per undas,
At vetus urbs niveae vellere dives ovis.

Secobia.
Gloria Thebarum narratur Pindarus. At tu
Sote pater civis Secobiensis eras.

SCHOLIUM.

Sotus e Praedicatoria familia olim praeceptor meus, in Dialecticis, divinarum literarum scientia Hispaniam illustravit.

Salamanca.
Cedant Felsineae, cedant Antenoris arces.
Eminet, et primo stat Salamanca loco.

Hispalis.
Hispalis illa ego sum, quam bello victor ab Afris
Rex pius Hernandus tertius eripuit.

Granata.
Victa decem annorum castris Granata superbis
Exueris sceptris, et nova Troia iaces.

-- 79 --

Corduba.
Lucanum, Senecasque duos, Menamque poetam.
Civibus annumerat Corduba docta suis.

Barchino.
Pauca loquar, verum quae dat mihi Barchina nomen
Factio, praeclaris floruit illa viris.

Valentia.
Quod valeam bello, quod pace, Valentia dicor.
Credere si non vis, experiare licet.

Caesaraugusta.
Illa vetus regem sedes, quam cingit Iberus
Amnis, ab Augusto Caesare nomen habet.

Metinna, et Pintia id est Valladolit.
Surgunt laude pares, et pulchro carmine dignae,
Metinna dives, et superba Pintia.