XXIX.

Illyr. Sctobi kolla sckripala, volovi ricju.

Cum plaustra deberent gemere, boves gemunt.

Bubulcus, Boves, et Plaustra.

Plaustro Bubulcus multam ut imposuit struem
Lignorum, eidem pertrahendo junxerat
Boves refectos admodum largo prius,
Laborem alacrius ut subirent, pabulo.
Nondum admonebat incitante aculeo,
Ut plaustrum ab illo praegrave moverent loco,
Cum triste quiddam mugientes audiit.
Stomachum movente re nova, dictis boves
His objurgasse fertur: haud ullos gravi
Dant plaustra gemitus jam subacta pondere,
Vos, queis nihildum trahitur, ingemiscitis?
Saepe ille queritur, quem levis cruciat dolor;
Saepe ille reticet, cura quem gravior premit.