IV.

Illyr. Pobiscese ſebbe ſa tughje sjedbe.

Propter alienam sementem fringilli concertarunt.

Semen tritici, et fringilli .

Fringilli in agro seminari triticum
Plures videbant; cumque defessus sator
Paulum in virenti consedisset gramine,
Haud longe eosdem de sibi jacta modo
Semente graviter litigantes audiit.
Sic coepit unus: ad sinistram portio
Quaecumque cecidit seminis, mea haec erit.
Tua ut sit, alter rettulit animosior,
Haud patiar, ipso nostra si lis debeat
Cruore dirimi. Vae! minax hic intonat,
Si sparsa media quae fuere in area,
Vestrum quis ausit adtigisse semina.
Dum prorsus igitur inter hos disconvenit,
Contentioque gliscit usque atrocior
Se turba rostris invicem inimicis ferit;
Granoque nullo devorato seminis
Alterna cuncti concidunt per vulnera.
De rebus aliqui dum rixam alienis serunt,
Res in perniciem saepe verterunt suas.