V.

Illyr. Medvjedje reko: roditchje kruscke.

Ursus dixit: pyra provenient.

Ursus, et Vulpes.

Per parva Vulpes cum videret hispidum
Ursum vagari, atque otioso lumine
Pyros tueri, vix adhuc cum primulis
Sese induisset arbor illa floribus,
Sic inquiebat tacita: quid malus hic latro
Hoc moliatur in loco, haud intelligo;
At velle ab istis aliquid arboribus puto:
Ultraque pergens per viam ut venit prope,
Salvere jussit, callideque interrogat.
Dic urse, quaeso (namque, ni fallor, modo
Praesagientis aliquid est vultus tibi)
Tenuem pyrorum copiam hocne praevides
Anno futuram, an uberem? Hic uberrimam
Fore pollicetur; cumque Vulpes quaereret
Causam, futuros scire qua eventus sibi
Fas esset, unam hanc mente pol! dignam sua,
Sibi ille fructus quod placeret, attulit.
O quot carenti mente sunt urso pares,
Dum quae peroptant, haec futura existimant!