Ad Azzonem Phorestum medicum
Nata tibi nuper prestanti corpore, forma,
Dicta sub Emonio Laodamia sono,
Sydere foelici Cumeos expleat annos,
Prebeat et doctas docta Minerua manus.
Et crescente die crescat prestantia forme,
Altera sit cultis Laodamia comis.
Nympharum sociam faciat castissima Phoebe,
Si cupiet fatis uirgo manere sacris.
Sed si coniugio casti gaudebit amoris,
Altera Penelope sit probitate, fide.
Sit specimen teneris tua nata puella puellis,
Digna sit Aoniis, Azzo Phoreste, sonis.