Marulić, Marko (1450-1524) [1496], De institutione bene vivendi per exempla sanctorum, versio electronica (, Split), Verborum 186963, Ed. Branimir Glavičić [genre: prosa oratio - tractatus] [word count] [marulmarinst].
Eustachius Romanus aduersis casibus in uita multum conflictatus et semper
superior, ita ut non immerito post beatum Iob alterum patientię dicatur
exemplar, amissis fortunis, seruis, uxore, liberis Christum suum (cuius
fidem miraculo edoctus acceperat) nunquam dimisit. Qua animi constantia
meruit post annos aliquot dure miserabiliterque peractos recuperare, quę
amiserat, uxorem scilicet olim a pyratis auectam, duos filios, alterum a
leone, alterum a lupo raptos; utrunque enim pastores illo inscio feris
erripuerant atque a pueritia ad adultam usque ętatem educauerant. Demum
ipsam, quam apud Traianum habuerat, militię dignitatem rursum recepit. Sed
maius his omnibus postremo sub Hadriano assecutus est: cum coniuge simul ac
liberis martyrii coronam, ut, quos pręter spem uiuos in terris reperisse
lętabatur, cum eisdem etiam uiueret in cęlo.
Marulić, Marko (1450-1524) [1496], De institutione bene vivendi per exempla sanctorum, versio electronica (, Split), Verborum 186963, Ed. Branimir Glavičić [genre: prosa oratio - tractatus] [word count] [marulmarinst].
|